Sistema presidencialista

Sistema presidencialista
forma de gobiernu
República y sistema políticu

El sistema presidencialista, tamién nomáu presidencialismu o sistema congresual, ye un sistema de gobiernu d'una república na que'l poder executivu escuéyese xebradamente del poder llexislativu. La constitución de los Estaos Xuníos ta reconocida como'l primer documentu oficial que describe'l sistema presidencialista modernu y qu'entá ta vixente.

La carauterística más importante del sistema presidencialista ye la manera na que s'escueye'l poder executivu. Les carauterístiques de los sistemes presidencialistes son:

• El presidente ye al empar xefe d'Estáu y xefe de Gobiernu.
• Nun hai nenguna rellación formal ente'l presidente y el llexislativu; namás hai un miembru y la so capacidá pa promulgar lleis ta llendada. Sicasí, el presidente tien el poder pa vetar les actes aprobaes pol llexislativu y, pela so banda una supermayoría del llexislativu tien el poder d'anular el vetu.
• El presidente tien un periodu fixu de gobiernu. Les eleiciones o reeleiciones faense en dates predeterminaes, y nun esiste'l conceutu de "moción de censura" pa botar a l'executivu y convocar eleiciones. Sicasí, la mayoria de los sistemes presidencialistes tienen amestadures nes lleis pa realizar xuicios presidenciales col envís de botar al presidente si tien cometío un crime.
• La estaya executiva ye unipersonal. Los meimbros del gabinete seleiciónalos el presidente, anque en dalgunos estaos con sistemes presidencialistes el poder llexislativu ha aprobar los miembros del gabinete. El presidente tien la capacidá de dar ordenes o de botar a cualesquier miembru del gabinete y del exércitu, ensin l'aprobación del llexislativu, pero nun pue echar a los xueces del poder xudicial.

La estaya llexislativa de los sistemes presidencialistes ye oficialmente conocida como'l "Congresu" o "Asamblea".

Dellos estaos presidencialistes son: Estaos Xuníos, Indonesia, les Filipines, Méxicu, Corea del Sur y los más de los estaos d'América del Sur.